~ 路易 前一陣與一位禮儀人閒聊時問：「你哋啲禮儀人都幾無聊吓，成日講有呢啲規矩又有嗰啲規矩。我真係唔明，神父會唔會因為隻手啲角度唔啱，或者經文唸錯左個聖體就無效？你哋又話啲教友要點要點，但唔通教友喺彌撒中企歪啲，或者唔記得起立坐低，咁領嘅聖體又無效囉喎？既然點都對個聖體無影响，咁你哋又仲講咁多，係咪好無聊呢？」那禮儀人望了我一眼，微笑地對我說：「你呢個仔都唔返屋企食飯嘅，使乜知道規矩唧？」然後接着說：「你返屋企係為充饑，我返屋企係為相聚同陪伴。因為要與老父老母、兄長及眾弟兄姊妹同枱，所以要有規矩。當然食嘅時候棟起隻腳、唔叫人、老竇講嘢你又擰轉面你都會食得飽，不過咁叫唔叫做返屋企食飯？至少我覺得你無規矩，老父老母會食得唔開心。」他還補充：「明白好多人都只係想返屋企揾嘢塞飽個肚，我亦唔認為天主會趕人出筵席。不過，同食嘅人應該想一下到底點解嚟食呢餐。而我，不過係同嗰啲想知規矩嘅人講啫，唔想知嗰啲就交俾天主。」 他最後補充：「同樣，送聖體並唔係FoodAngel，佢唔係食物速遞。送聖體係因為我哋當中有希望一齊坐席嘅弟兄姊妹由於個人狀況未能共宴，於是我哋將團體共融嘅快樂同基督嘅平安送到佢哋當中。因此送聖體唔係去到唸完經，一手交聖體一口領聖體就簽收完畢講『拜拜』，重要係陪伴。聆聽吓嗰位弟兄姊妹嘅近況、問候吓、分享吓堂區同信仰嘅新消息，使佢唔會覺得同堂區或者信仰脫節。更重要當然係令嗰位弟兄姊妹唔會因為未能返堂區而感覺孤單，甚至覺得失去主基督嘅温暖。所以若果陪伴時，嗰位弟兄姊妹想去飲茶多過領聖體，我哋應該去飲茶。然後再揾時間同機會將主嘅體血送俾佢，使佢喺身心靈層面都能與主結合。慈善的撒瑪黎雅人並唔係對住個傷者唸完兩篇經再劃十字聖號俾底錢就行左去，而係陪伴、關懷同探望。 禮儀係一家人嘅事，係自己人嘅事。若果我哋將家事睇成公事，咁真係好無聊。就連返屋企俾對阿媽講『食飯』，或者仔女對我哋講『早晨』應該都枯燥乏味，無聊至極。」 中秋佳節，求天主派遣聖神使我們不再心硬，並祝願我們與天上及地上的父母和親人都能好好相聚，不再無聊地相見。主佑！